Border Bullies - of te wel die wat jou besluite bevraagteken

Ons was nou onlangs met Simeon by 'n Pediatriese Neuroloog by 'n staatshospitaal. Dit was 'n verwysing deur die spraakterapeute wat graag wil weet of sy brein die boodskappe van luister en praat reg verwerk. Dit het gevoel of hulle my derms uitryg, aangesien hulle baie vrae gevra het. Hy moet 25 Maart 'n MRI breinskandering kry - onder narkose (gas) anders kan hy beweeg.
Daarna wou hulle weet waar Simeon skool gaan. Ek begin die nut insien om mens se homeschool 'n naam te gee. So kan mens weg kom met ongemaklike vrae. Iets soos "Olyfboompies Voorskoolsentrum" (Ps 128) en dis 'n privaat insteling klink beter as homeschool. My huis is mos privaat. Dit kan uitgebrei word na laerskool en hoërskool.
En daar kry ek 'n hele ding oor die sosialiseringsaspek van hs. Dokters in staatshospitale lyk my grootliks hoofstroom en wyk nie af van die staatsmodelle nie.
En kan julle glo hulle sê hulle sal hom evalueer oor 'n tydperk en dan moet daar besluite geneem word. Amper op 'n trant van hulle sal besluit en ek sal daarby moet inval. En sê ek moet die hs heroorweeg. Stel toe Eduplex voor, 'n privaatskool wat veral spesialiseer in kinders met ADD/ADHD probleme lyk my. Maandelikse skoolgeld R1650!!!! Plus adminfooi en plekbespreekfooi vir die volgende jaar. Om dit te kan doen sal ek moet gaan werk, Joshua by 'n dagmoeder los en dan praat ons nie van die stadsverkeer, my baie beperkte klerekas wat uitgebrei sal moet word, ens.
En hierdie is alles ongevraagde inligting. Ek is daar vir die evaluering van my kind se brein. Ek het nooit raad gevra oor my keuse van skoling van my kind. Ek het eintlik geen raad gevra nie. Dis 'n probleem as mens self dokters as konsultante in jou en jou gesin se gesondheid begin sien, en hulle dink nog hulle het alle mag in die hand.
Ek hoop net nie ons het ons hiermee oop gestel vir vrae van die staat af oor hs nie. Maar gelukkig kan ek net sê: "Moenie met my praat nie, praat met my regsverteenwoordiger."

Dilemma 1:
Ek wonder of ons maar hier 'n paar veranderings moet aanbring en weer anoniem moet wees nie. Sal dit ons beskerm? Maar ek voel tog ek wil opstaan vir wat ek wil doen.

Boonop wil hulle hê ek moet vra vir 'n voorskrif van Risperdal. Hulle dring amper daarop aan. Wil dit voorskryf. Medikasie wat vir volwasse psigotiese pasiente voorgeskryf word. Kinders kry net 'n baie klein dosis. Dis omdat almal Simeon as hiperaktief beleef. Dis nou hoe hy optree die oomblik as hy onder druk geplaas word en net as hy nie by die huis is nie.
Nog iets waarvoor ek glad nie gevra het nie, en nie eens in gedagte gehad het nie. Een van die groot redes waarom ons ook homeschool. By die huis is daar geen druk nie.
Hulle het geen voorstelle oor dieet en gedragsverandering gemaak nie. Niks gevra oor ons program in die dag en Simeon se aktiwiteite nie, of hoeveel tv hy kyk nie. En toe ek daaroor vra was die antwoord dat dit niks sal verander nie.
VET CHEAK!!!!
Simeon was 'n baie rustige baba wat maklik geslaap het en ook baie nie baie aktief was en steeds nie is nie. Ek het van die begin af gesê ek sal lag as iemand hom ooit diagnoseer met ADD. En nou lag ek glad nie, ek is kwaad.
Hier moet ek erken dat ek besef het dat baie geleidelik die televisie (net dvd's en videos) vir my 'n kinderoppasser geword het. Ek het dit begin misbruik om nie die aanhoudende gepraat stil te maak. En ek het ook nie baie goed gekyk na hoe Simeon eet nie. Nadat ek dit verander het het baie dinge al verbeter.

Dilemma 2:
2. Risperdal. En die ding dat elke halwe kind met ADD/ADHD gediagnoseer word.

Ek wil nie Simeon aan klasse van 28 of 36 of 42 kinders blootstel nie. Ek WIL hom nou beskerm teen die wreedheid van kinders wat hom sal spot oor sy spraak (nie weghou van ander nie). Ek wil nie dat hy gedruk word om te leer lees nie, indien hy nie wil nie. Hy wil nou net skryf en nie lees nie.

Maar ek gaan my nie steur aan boelies, maar net hul vrae en besware gebruik om my besluit beter te verwoord vir myself.